Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
ใซ้งาน	sai-ŋa:n	HF-HR	ใช้งาน	to use, to put to use	90/28

Link to overview page
Link to dictionary

Basic vocabulary — page 18 — Series B, pictures 18-20: hand, thumb, index finger

18
นี้คืออี่หยัง นี้คือมือ อันนี้เป็นมือ เป็นมือของคน
ทุกคนต้องมีมือ ต้องมีมือสองข้าง แต่ละคนต้องมีมือสองข้าง
มือเอาไว้เฮ็ดหญัง เอาไว้ใซ้งานจั่งใด มือมีปะโยดบ่ ปะโยดของมือมันมีบ่ กะมีอยู่ มือมีปะโยดหลาย มือมันสำคันคัก สำคันอี่หลี
ขั้นคนบ่มีมือ กะบ่สามาดจับสิ่งของได้ บ่สามาดจับอันนี้ บ่สามาดจับอันนั้นได้
เพาะสะนั้นแล้ว มือสำคันหลาย มือเฮาสามาดจับสิ่งของได้ จับอันนั้น จับอันนี้ หลือใซ้เฮ็ดงาน หลือใซ้เฮ็ดหญังกะได้
แต่ละคนกะสิมีมือสองข้าง มือแต่ละข้างกะสิมีห้านิ้ว
มือหนึ่งข้างกะสิมีห้านิ้ว มีนิ้วโป้ มีนิ้วซี้ มีนิ้วกาง มีนิ้วนาง แล้วกะมีนิ้วก้อย
มือของคนเฮามีสองข้าง กะสิมีนิ้วห้านิ้วคือกัน

19
นี้คืออี่หยัง นี้คือนิ้ว
อันนี้เป็นนิ้วอี่หยัง อันนี้เป็นนิ้วโป้ เป็นนิ้วโป้

20
นี้คืออี่หยัง อันนี้กะเป็นนิ้วคือกัน อันนี้กะเป็นนิ้ว เป็นนิ้วซี้ คนเฮาเอิ้นนิ้วนี้ว่านิ้วซี้

Basic vocabulary — page 21 — Series B, pictures 18-20: lake, boat, duck, to swim

18
นี้คืออี่หยัง อันนี้เป็นหนองน้ำ หลือสะน้ำนั้นหละ
อยู่ข้างหลังหนองน้ำมีอี่หยังแน่ กะสิมีหลายอย่าง มีต้นไม้พ้อม มีต้นไม้หลายต้น
อยู่ข้างหลังต้นไม้หนั้น หลืออยู่ทางหลังป่าไม้หนั้น กะสิเป็นพูเขา มีพูเขาพ้อม พูเขาลูกบักใหญ่หนึ่ง

19
นี้คืออี่หยัง อันนี้กะเป็นเลีย
เป็นเลียลอยอยู่ในหนองน้ำ เป็นเลียลำหนึ่ง
เลียนี้ใซ้เฮ็ดอี่หยัง เอาไว้ถ้านั่ง หลือเอาไว้ถ้าขี่ หลือเอาไว้ถ้าใซ้งานอยู่ในหนองน้ำนั้นหละ
เลียนี้เฮ็ดมาจากอี่หยัง เลียนี้เฮ็ดมาจากไม้ เฮ็ดมาจากขอนไม้ใหญ่ๆ หลือเฮ็ดมาจากลำต้นไม้ที่มันมีต้นใหญ่ๆ
แล้วอยู่ข้างหลังหนองน้ำ หลือข้างหลังเลียนี้ มีอี่หยังแน่ กะสิมีต้นไม้คือเก่านั้นหละ มีต้นไม้หลายต้น หลือเป็นป่าไม้นั้นหละ แล้วกะสิมีพูเขาพ้อม เป็นพูเขาน่วยบักใหญ่หนึ่ง มีหลายน่วยเอาโลด

20
นี้คืออี่หยัง อันนี้เป็นเป็ด
แล้วมันเฮ็ดอี่หยังอยู่ เป็ดซุมนี้มันเฮ็ดอี่หยังอยู่ มันกำลังลอยน้ำอยู่ กำลังลอยน้ำอยู่ในหนอง
จักมันลอยเฮ็ดหญังกะบ่ฮู้ อาดสิหากิน หลือสิหากินเญี่ยกะได้
เป็ดซุมนี้มีจักโต เป็ดซุมนี้มีสามโต มันลอยอยู่น้ำนั้นสามโต

Basic vocabulary — page 09 — Series B, pictures 18-20: fork, to eat, to clean/wash

18
นี้คือซ้อนส้อมแม่นบ่ แม่น นี้คือซ้อนส้อม
ซ้อนส้อมเฮ็ดมาจากอี่หยัง ซ้อนส้อมเฮ็ดมาจากเหล็ก ซ้อนส้อมเฮ็ดมาจากพะสะติกกะได้ ซ้อนส้อมสามาดเฮ็ดได้มาจากหลายอย่าง
ซ้อนส้อมมันอันใหญ่บ่ บ่ ซ้อนส้อมมันอันบ่ใหญ่ ซ้อนส้อมมันอันพอดี
ซ้อนส้อมมันอันแหลมหลาย แหลมบักคัก แหลมบักคักหนึ่ง
ซ้อนส้อมเอาไว้เฮ็ดหญัง ซ้อนส้อมเอาไว้ถ้ากินเข้า เอาไว้ใซ้งานคู่กันกับซ้อน เอาไว้ถ้าตักกินแนวกิน

19
เขากำลังเฮ็ดหญัง เขากำลังกินเข้าอยู่ เขากินเข้ากับลูกซิ้น เขาใซ้ซ้อนส้อมเสียบลูกซิ้นอยู่ในจาน
แนวกินอันนี้ฮ้อนบ่ ฮ้อนอยู่ เบิ่งแนวกินอยู่ในจานแล้วคือสิฮ้อนอยู่ หลือว่าอุ่นอยู่ เพาะว่ามันมีควนลอยขึ้นมา กะเลยฮู้ว่า แนวกินอันนี้มันฮ้อนอยู่ หลือว่าอุ่นอยู่
แนวกินอันนี้เป็นตาแซบบ่ บ่ลู้คือกัน เบิ่งซงแล้วบ่เป็นตาแซบเท่าใด

20
เขากำลังเฮ็ดหญัง เขากำลังล้างซ้อนส้อม
เขาล้างซ้อนส้อมเฮ็ดหญัง บ่ลู้คือกัน มันอาดสิสกกะปกกะได้ เขากะเลยล้าง
ขั้นล้างแล้ว มันกะสิสะอาด มันกะสิเป็นตากิน มันกะเป็นตาเอามาใซ้งานอีกเที่ยหนึ่ง
เขาล้างซ้อนส้อมอยู่ใส เขาล้างซ้อนส้อมอยู่ในน้ำ เขาใซ้ฟองน้ำสีเหลียงล้างซ้อนส้อม
เขาล้างซ้อนส้อมอยู่ในกะละมังแม่นบ่ แม่นอยู่ เขาล้างซ้อนส้อมอยู่ในกะละมัง กะละมังใบบักใหญ่หนึ่ง กะละมังใบสีแดง

Basic vocabulary — page 22 — Series B, pictures 15-18: eye, to look, to close the eyes

15
นี้คืออี่หยัง อันนี้เป็นตา อันนี้เป็นตาของคน
อยู่ในตากะสิมีน่วยตา น่วยตาสิเป็นสีดำ
ตาของคนสิเป็นสีขาว แต่ว่าน่วยตานั้นสิเป็นสีดำ
ตานี้ไว้ถ้าแนม ตาสามาดแนมได้ซู่อย่าง
ขั้นคนเฮาบ่มีตา กะบ่สามาดแนมได้ บ่สามาดเห็นฮุ่ง แนมอี่หยังกะบ่เห็น
ขั้นคนตาบอด กะบ่สามาดแนมเห็น บ่สามาดแนมได้จักอย่าง
แล้วพุซายคนนี้กำลังมืนตาอยู่ เขากำลังแนม กำลังแนมไปข้างหน้า

16
เขากำลังเฮ็ดหญัง เขากำลังแนม กำลังแนมไปทางซ้าย
กำลังแนมไปทางซ้ายอยู่ แต่ว่าเขาแนมอี่หยัง เขาใซ้ตาสองข้างของเขานั้นหละ กำลังแนมไปทางซ้ายอยู่

17
เขากำลังเฮ็ดหญังอยู่ เขากำลังหลับตา เขากำลังหลับตาอยู่
ขั้นคนหลับตาอยู่ หลือว่าหลับตาอยู่หนี้ สิบ่สามาดแนมอี่หยังเห็น หลือว่านอนหลับ
ขั้นคนนอนหลับกะสิหลับตา แล้วกะบ่สามาดแนมอี่หยังได้จักอย่าง กะคือหลับตาอยู่ ตาเฮากะสิปิด หลือว่าบ่ได้ใซ้งานตาแล้ว

18
เขากำลังเฮ็ดหญัง เขากำลังมืนตา
พุซายคนนี้เขากำลังมืนตาอยู่
เขาอาดสินอนตื่นแล้ว หลือเซาหลับตาแล้ว เขากะเลยมืนตาขึ้น เพื่อที่สิสามาดแนมได้ซู่สิ่งซู่อย่าง หลือว่าแนมเห็นได้ทุกสิ่งทุกอย่าง

Basic vocabulary — page 12 — Series B, pictures 08-11: heavy, light, to weigh, stone, to lift

8
นี้คืออี่หยัง นี้คือกะลัง หลือก่อง
มีก่องใบใหญ่ กับก่องใบน้อย
ก่องใบใหญ่ใบสีเหลียง ก่องใบน้อยใบสีฟ้า วางอยู่ข้างๆ ก่องใบใหญ่

9
เขากำลังเฮ็ดหญัง เขากำลังซั่งน้ำหนัก เขาซั่งน้ำหนักอยู่เทิงตาซั่ง
เขาเอาก่องสองใบไปซั่งน้ำหนัก มีก่องใบน้อย กับก่องใบใหญ่
ก่องอันไหนหนักกว่ากัน ก่องใบใหญ่กะสิหนักกว่า ก่องใบน้อยกะสิบ่หนัก
เพาะว่าก่องใบน้อยมันกะต้องเบาอยู่แล้ว ก่องใบใหญ่มันกะต้องหนักอยู่แล้ว
เพาะสะนั้นแล้ว ก่องอันไหนหนักกว่ากัน ก่องสีเหลียงหนักกว่าก่องสีฟ้า

10
เด็กน้อยพุซายกำลังเฮ็ดหญัง เขากำลังยืนอยู่ เขากำลังยืนแนมก้อนหินอยู่
จักเขาสิเฮ็ดหญัง เขาอาดสิญกก้อนหินนี้ขึ้นกะได้
ก้อนหินนี้เป็นตาหนักบ่ กะสิหนักอยู่ เพาะว่ามันเป็นก้อนหิน ก้อนหินมันหนักบักคักหนึ่ง หนักหลายกะด้อกะเดี้ย

11
เด็กน้อยพุซายเขากำลังเฮ็ดหญัง เขากำลังญกก้อนหินขึ้น
จักเขาญกก้อนหินขึ้นเฮ็ดหญัง เขาอาดสิเอาไปใซ้งานกะได้
ก้อนหินอันนี้หนักบ่ กะสิหนักอยู่ เบิ่งจากสีหน้าของเขาแล้ว เป็นตาหนักหลาย
เขาญกก้อนหินขึ้น เหงี่ยเขากะไหลออกพ้อม เทิงหน้าเขากะเค่งเคียดขึ้นพ้อม มันเป็นตาหนักหลาย เป็นตาหนักบักคักหนึ่ง
แล้วก้อนหินมันกะก้อนใหญ่พ้อม มันบ่ได้ก้อนน้อยๆ ขั้นก้อนน้อยๆ มันกะสิบ่หนัก แต่อันนี้มันก้อนบักใหญ่ มันหน้าสิหนักบักคักหนึ่ง มันเป็นตาหนักกะด้อกะเดี้ย

Basic vocabulary — Page 26 — Series B, pictures 18-20: phone, battery, running low/out of battery, to charge, full

18
อันนี้คืออี่หยัง อันนี้เป็นโทละสับ
เป็นโทละสับยี้ฮ้อหนึ่งนี้หละ สี่เหลี่ยม เคี่ยงสีเหลียง
แล้วตอนนี้มันเป็นอี่หยังอยู่ แบ็ดเบิด หน้าจอกำลังสิดับ
ใซ้งานบ่ได้เลยขั้นแบ็ดเบิดแม่นบ่ แม่น
ขั้นแบ็ดเบิดสิเฮ็ดหญังได้บ่ บ่ บ่ได้เลย เฮ็ดหญังบ่ได้เลย ใซ้งานบ่ได้พ้อมนอกจากสิไปซ่าดแบ็ดโทละสับ ให้มันมีแบ็ดอยู่ในโทละสับเคี่ยงนี้

19
โทละสับ เป็นโทละสับเคี่ยงหนึ่งกำลังซ่าดแบ็ดอยู่ ซ่าดแบ็ดเตอลี้อยู่
เป็นหญังเขาคือซ่าดแบ็ดเตอลี้ แบ็ดเตอลี้ในโทละสับเคี่ยงนี้ หลือว่าแบ็ดในเคี่ยงนี้อาดสิเบิดแล้ว อาดสิบ่มีแล้ว เขากะเลยมาซ่าดเพื่อที่สิใซ้งานโทละสับเคี่ยงนี้
เป็นหญังต้องซ่าด ขั้นบ่ซ่าดโทละสับกะบ่สามาดใซ้งานได้ ขั้นโทละสับบ่มีแบ็ดกะใซ้งานบ่ได้ เพาะสะนั้นแล้วต้องซ่าดแบ็ดโทละสับ มันจั่งสิใซ้งานได้ปกกะติ หลือว่าใซ้งานได้คือเก่า

20
อันนี้คืออี่หยัง อันนี้กะเป็นโทละสับ เป็นโทละสับเคี่ยงหนึ่ง
แล้วมันเกิดอี่หยังขึ้นตอนเนี้ย กะโทละสับคือเก่านั้นหละ บ่มีหญังเกิดขึ้น เห็นแต่ว่าในโทละสับเคี่ยงนี้มีแบ็ดเต็มปี้ลี้ เต็มปี้ลี้เลยหละ บ่มีหม้องฟิ่วเลย
แบ็ดเตอลี้เบิ่งจากใส กะเบิ่งหม้องก้อนสีเขียวๆ หนะ ก้อนสี่เหลี่ยมหน่อยๆ อยู่กางโทละสับ มันกะสิเป็นสีเขียว คือ อันนั้นคือแบ็ดเตอลี้
ขั้นมันเหลียเคิ่งหนึ่ง เหลียขีดสีเขียวเคิ่งหนึ่ง กะเอิ้นว่าแบ็ดเตอลี้มีเคิ่งเดียว
ขั้นแบ็ดเบิดกะคือเป็นขีดสีเหลียง คือจั่งผ่านๆ มา แล้วบ่สามาดใซ้งานได้
ขั้นมีแบ็ดเตอลี้มันสิใซ้งานได้บ่ ใซ้งานได้ ขั้นมีแบ็ดเตอลี้กะสามาดใซ้งานได้ เฮ็ดหญังได้ซู่สิ่งซู่อย่าง

Basic vocabulary — page 09 — Series B, pictures 15-17: radio, to switch on/off, quiet/loud

15
นี้คืออี่หยัง นี้คือวิทะยุ วิทะยุเคี่ยงสีเทา วิทะยุเคี่ยงบ่ใหญ่ วิทะยุเป็นลูบสี่เหลี่ยม
วิทะยุเอาไว้เฮ็ดหญัง วิทะยุเอาไว้ฟังเพง วิทะยุเอาไว้ฟังข่าว
วิทะยุมีลำโพงพ้อม วิทะยุมีปุ่มปับเสียงพ้อม วิทะยุมีปุ่มเปิดกับปิดพ้อม
ขั้นบ่มีปุ่มเปิดและปุ่มปิด วิทะยุกะสิใซ้งานบ่ได้
ตอนนี้วิทะยุปิดหลือเปิด ตอนนี้วิทะยุปิดอยู่ วิทะยุบ่ได้ใซ้งาน ตอนนี้วิทะยุกำลังปิด
วิทะยุใซ้ไฟฟ้าบ่ บ่ วิทะยุเคี่ยงนี้บ่ได้ใซ้ไฟฟ้า วิทะยุเคี่ยงนี้ใซ้ถ่าน
ขั้นบ่มีถ่าน วิทะยุกะใซ้งานบ่ได้ ขั้นวิทะยุมีถ่าน วิทะยุกะใซ้งานได้ปกกะติ

16
นี้คืออี่หยัง นี้คือวิทะยุ วิทะยุเคี่ยงนี้กำลังใซ้งานอยู่ ได้ญินวิทะยุเคี่ยงนี้เปิดเพงอ่มๆ อยู่ สงสัยวิทะยุเคี่ยงนี้กำลังเปิดเพงอยู่
แล้วเปิดเพงอี่หยัง บ่ลู้คือกันจักเขาเปิดเพงอี่หยัง ได้ญินเสียงค่อยๆ ได้ญินเสียงค่อยๆ หนึ่ง
วิทะยุเคี่ยงนี้เปิดเพงเบาแม่นบ่ แม่น วิทะยุเคี่ยงนี้เปิดเพงเบา บ่ได้เปิดเพงแฮง เปิดเสียงค่อยๆ หนึ่ง

17
วิทะยุเคี่ยงนี้กำลังเปิดเพงเสียงดังแม่นบ่ แม่น วิทะยุเคี่ยงนี้กำลังเปิดเพงเสียงดังคัก เปิดดังกะด้อกะเดี้ย เปิดดังบักคักหนึ่ง
เป็นหญังเขาคือเปิดเสียงดัง บ่ลู้คือกัน เขาอาดสิมักฟังเสียงดัง เขากะเลยเปิดเสียงดังกะได้
ขั้นเปิดเพงเสียงดังมันดีบ่ บ่ลู้คือกัน แล้วแต่คนมัก ขั้นคนมักดังแฮงๆ เขากะสิเปิดเสียงแฮงๆ ขั้นคนใดมักฟังเสียงค่อยๆ เขากะสิเปิดค่อยๆ
แต่ว่าขั้นคนใดบ่มักเปิดแฮง แล้วมาเปิดแฮง เขากะบ่มัก เขาอาดสิลำคาน หลือเป็นตาหน่ายกะได้

Basic vocabulary — Page 03 — Series B, pictures 18-20: mortar, pestle, chili, to pound

18
นี้คืออี่หยัง อันนี้กะเป็นคก เป็นคกกับสาก เป็นของคู่กัน สองอันนี้ใซ้งานคู่กัน
คกกับสากกะมีหน้าที่ว่าเอาไว้ถ้าตำ ตำอี่หยังกะได้ ตำบักพิกกะได้ ตำเข้าสานกะได้ ตำอี่หยังกะได้ เพื่อที่ว่าอยากให้สิ่งนั้นมันแหลก หลือว่าอยากให้สิ่งนั้นมันมุ่น มุ่นอุ้ยปุ้ยนั้นหละความหมายหนะ

19
เขากำลังเฮ็ดหญัง คนคนหนึ่งเขากำลังเอาบักพิกลงไปในคก
เขาเอาบักพิกลงไปในคกเฮ็ดหญัง เขาอาดสิเอามาตำ อาดสิเอาบักพิกนี้มาตำ อาดสิอยากให้บักพิกนี้มันแหลก หลือว่าให้มันมุ่นนั้นเอง เขากะเลยสิเอามาตำ
เขาเอาบักพิกลงไปจักน่วย ที่แนมเห็นกะมีอยู่สามน่วย บักพิกมีอยู่สามน่วย บ่ได้มีหลายซ้ำ เขากำลังโญนลงไปในคก
แล้วบักพิกน่วยใหญ่บ่ กะน่วยบ่ใหญ่ปานใดดอก กะน่วยพอปะมาน
แล้วเขาสิตำบักพิกเฮ็ดหญัง เขาอาดสิเอาไปเฮ็ดแนวกิน หลือว่าเอาไปปุงแนวกิน เขาอยากให้แนวกินนั้นลดซาดมันจัดๆ หลือว่าลดซาดมันเผ็ด เขากะเลยสิเอาบักพิกนี้มาตำ แล้วกะเอาไปปุงแนวกินนั้นเอง

20
เขากำลังเฮ็ดหญัง เขากำลังตำบักพิก
เขาใซ้มือข้างซ้ายของเขาจับสาก อีกข้างหนึ่งกะข้างขวาจับคกบัดหนิ เขากะใซ้มือข้างซ้ายของเขาตำๆๆ จับสากแล้วกะตำๆๆๆ บักพิกเนาะ
เป็นหญังเขาคือตำบักพิก เขาอาดสิอยากให้บักพิกนั้นมันแหลก เขากะเลยสิตำบักพิก เอาสากตำบักพิกลงไปในคกเนาะ
แล้วเขาตำแฮงบ่ กะสิตำแฮงอยู่ กะสิใซ้แฮงหลาย ขั้นตำค่อยบักพิกกะบ่แหลก บักพิกกะบ่มุ่น ขั้นตำแฮงบักพิกกะสิมุ่น บักพิกกะสิแหลก

Basic vocabulary — Page 28 — Series B, pictures 06-08: old, new, car, shirt, house

6
อันนี้คืออี่หยัง อันนี้เป็นลด เขาเอิ้นว่าลดเก็ง
ลดเก็งมีจักคัน ลดเก็งกะมีสองคัน มีคันที่หนึ่งกับคันที่สอง
คันที่หนึ่งเป็นแบบใด คันที่หนึ่งกะอยู่ฝั่งซ้าย ซ้ายมือที่เฮาเห็นเนาะ มีลักสะนะใหม่ๆ เป็นลดใหม่ๆ บ่มีฮอยอี่หยังเลย อาดสิเป็นลดส้างมาใหม่ หลือว่าผะหลิดมาใหม่ เฮ็ดมาใหม่เนาะ กะใหม่เอี่ยม บ่มีฮอดหม้องอี่หยังหม้องพังหม้องหญังเลย
แล้วลดคันที่สองหละ เป็นลดคันบ่ใหม่ดอก ลดคันเก่า อาดสิซื้อมาแต่โดนแล้ว หลือว่าขี่มาแต่โดนแล้ว ผะหลิดมาแต่โดน เฮ็ดมาแต่โดนแล้ว

7
อันนี้คืออี่หยัง อันนี้กะเป็นเสี้ย เสี้ยยื้ดเนาะ เป็นเสี้ยยื้ด ไว้ถ้าใส่หนิหละ เสี้ยแขนสั้น
โตใหญ่บ่ กะจักคือกัน แล้วแต่ บ่ลู้ว่าไซอี่หยัง
เป็นโตสีเหลียง มีสองโต โตหนึ่งกะใหม่ๆ ดอก บ่มีฮอดฮอยอี่หยังเอาโลด บ่มีฮอยใส่ อาดสิเป็นเสี้ยโตใหม่ เสี้ยบ่ทันได้มีคนใส่จักเที่ย
แต่ว่าอีกเสี้ยอีกโตหนึ่งกะคือสิเก่าแล้ว คือสิมีคนใส่ดุแล้ว หลือว่าใซ้งาน ผ่านกานใซ้งาน คนใส่มาดุแล้ว กะเลยเก่า เบิ่งไปแล้วดำปี้ๆ อยู่ บ่มีฮอยใหม่อี่หยังเลย มีแต่ฮอยเก่า มีแต่ฮอยเปี้ยนฮอยหญังเนาะ

8
อันนี้คืออี่หยัง อันนี้กะเป็นบ้านเนาะ เป็นบ้านไม้ สองซั้นพุ้นแหล้ว
มีสองหลัง เปียบเทียบกัน หลังหนึ่งกะใหม่ๆ ดอก อาดสิส้างขึ้นมาใหม่เนาะ บ้านหลังนี้อาดสิส้างขึ้นมาใหม่
อีกหลังหนึ่งกะเก่าๆ อาดว่าส้างมาแต่โดนแล้ว เฮ็ดแต่โดนแล้ว อยู่ในบ้านหลังนี้โดนเติบ หลายปีหลายเอ่ยแล้วเนาะ กะสิเฮ็ดให้บ้านเก่าขั้นใซ้งานโดนเติบ หลือว่าผ่านอี่หยังมาหลาย มันกะสิเก่า มันกะสิเก่าสิฮ้างสิเพไปเลี้ยยๆ เนาะ

Basic vocabulary — page 07 — Series B, pictures 01-05: A/C, remote, cold, bedroom, bed/pillow/blanket, to switch on/off

1
นี้คืออี่หยัง นี้คือแอ
แอมีไว้เฮ็ดหญัง แอมีไว้ถ้าเฮ็ดให้อากาดเย็น
แอเอาไว้ใส แอเอาไว้ในห้อง แอเอาไว้ในห้องนอนหลือเอาไว้ในบ้านกะได้
แอมีลาคาแพงบ่ แพงอยู่ แอมีลาคาแพง แต่กะบ่แพงคัก
แอมันเฮ็ดให้เปียงไฟบ่ เปียงอยู่ แอมันเฮ็ดให้เปียงไฟหลาย

2
นี้คืออี่หยัง นี้คือลีโหมดแอ
ลีโหมดแอมีไว้เฮ็ดหญัง ลีโหมดแอมีไว้ถ้าเปิดหลือปิดแอ
ลีโหมดแอสำคันบ่ สำคันอยู่ ลีโหมดแอสำคันหลาย ขั้นบ่มีลีโหมดแอกะเปิดปิดแอบ่ได้
ลีโหมดแอใซ้งานได้หลายอย่างบ่ ใซ้ได้อยู่ ลีโหมดแอสามาดใซ้งานกับแอได้หลายอย่าง สิตั้งเวลาปิดแอ หลือตั้งเวลาเปิดแอ หลือเพิ้มความเย็น หลือลดความเย็นกะได้
ลีโหมดแออันใหญ่บ่ บ่ ลีโหมดแออันบ่ใหญ่ ลีโหมดแออันพอดี บ่น้อยหลาย บ่ใหญ่หลาย

3
นี้คืออี่หยัง นี้คือห้องนอน
ห้องนอนมีไว้เฮ็ดหญัง ห้องนอนมีไว้ถ้านอน
ห้องนอนมีหญังแน่ ห้องนอนมีแอ ห้องนอนมีเตียงนอน ห้องนอนมีผ้าห่ม ห้องนอนมีหมอน ห้องนอนมีอีกหลายๆ อย่างที่ห้องสามาดเอาไว้ได้นั้นได้

4
เขากำลังเฮ็ดหญัง เขากำลังเปิดแอ
เขาเปิดแอจั่งใด เขาใซ้มือของเขากดลีโหมดแล้วกะเปิดแอ
เป็นหญังเขาคือเปิดแอ เขาอาดสิฮ้อน เขาอยากสิให้อากาดในห้องของเขาเย็น เขากะเลยเปิดแอ
ขั้นเขาเปิดแอแล้ว มันสิเย็นบ่ เย็นอยู่ มันสิเย็นหลาย ขั้นเปิดแอแล้วมันสิเย็น

5
เขากำลังเฮ็ดหญัง เขากำลังปิดแอ
เขาปิดแอจั่งใด เขาใซ้มือของเขากดลีโหมดแล้วกะปิดแอ
เป็นหญังเขาคือปิดแอ เขาอาดสิหนาว เขาอาดสิบ่ใซ้งาน หลือเขาสิอาดไปข้างนอกกะได้ เขาเลยปิดแอ
ขั้นเขาปิดแอแล้ว แอมันสิใซ้งานอีกบ่ บ่ ขั้นแอปิดแล้ว เคี่ยงแอมันกะสิปิด เคี่ยงแอมันกะสิดับ แอกะสิบ่ได้ทำงานอีก

Basic vocabulary — page 17 — Series B, pictures 13-15: notebook, to charge

13
นี้คืออี่หยัง นี้คือโน่ดบุ่ก เป็นโน่ดบุ่ก เอาไว้ใซ้งาน ค้ายๆ กับค็อมพิวเต้อ แต่ว่าอันนี้เป็นโน่ดบุ่ก สามาดพกพาได้ สามาดถือไปใสกะได้
สิต่างจากค็อมพิวเต้อ แต่ว่าใซ้งานค้ายๆ กับค็อมพิวเต้อ คือๆ กับค็อมพิวเต้อนั้นหละ แต่อันนี้สามาดถือไปใซ้งานทางอื่นได้ สามาดเคื้อนที้ได้
แต่ว่าค็อมพิวเต้อบ่สามาดเคื้อนที้ได้ ค็อมพิวเต้อเอาไว้แต่ไว้บ้าน หลือเอาไว้หม้องแห่งงานซื่อๆ บ่สามาดถือไปนำได้
ส่วนปะกอบของโน่ดบุ่กนี้ กะสิมีหน้าจอพ้อม มีแป้นพิมพ้อม หลือมีเมาพ้อม แต่ว่าในลูบนี้เฮาแนมบ่เห็นเมาเนาะ
กะสิสามาดใซ้งานได้คือค็อม หลือสามาดใซ้งานค้ายๆ กับค็อมพิวเต้อได้คือกันทุกอย่าง
โน่ดบุ่กอันนี้สามาดใซ้งาน หลือเฮ็ดได้คือกันกับค็อมพิวเต้อ คือกันทุกอย่าง
โน่ดบุ่กอันนี้มีลาคาแพงบ่ กะแพงอยู่ กะแพงคือกัน แพงคัก
แต่ว่า กะแล้วแต่ยี่ห้อ แล้วแต่ลุ้นของมัน ลุ้นแพงกะแพง ลุ้นถืกกะถืก ขั้นลุ้นแพงหลาย กะสามาดใซ้งานได้โดน ขั้นลุ้นถืกหลาย กะสามาดใซ้งานได้แป่บเดียว หลือสามาดใซ้งานได้บ่โดนนั้นหละ

14
เขากำลังเฮ็ดหญัง เขากำลังเหล้นโน่ดบุ่ก เขากำลังใซ้งานโน่ดบุ่กอยู่
เขาเหล้นโน่ดบุ่กเฮ็ดหญัง อันนี้กะบ่ฮู้คือกัน จักว่าเขาเฮ็ดงาน หลือเหล้นเกม หลือเฮ็ดอี่หยังกะบ่ฮู้ แต่ว่า ฮู้แต่ว่าเขาใซ้งานโน่ดบุ่กนี้อยู่ เขากำลังเหล้นโน่ดบุ่กนี้อยู่

15
เกิดอี่หยังกับโน่ดบุ่กอันนี้ กะบ่ได้เกิดอี่หยังขึ้น กะฮู้แต่ว่าเขากำลังซ่าดแบ็ดอยู่ ซ่าดแบ็ดโน่ดบุ่กอันนี้อยู่
เป็นหญังเขาคือซ่าดแบ็ด โน่ดบุ่กอันนี้อาดสิแบ็ดเบิด หลือบ่มีแบ็ดเตอลี้แล้วกะได้ เขากะเลยซ่าดแบ็ด เพื่อที่สิสามาดใซ้งานได้
ขั้นโน่ดบุ่กอันนี้บ่มีแบ็ดเตอลี้ หลือบ่มีแบ็ด กะบ่สามาดเหล้นได้ หลือบ่สามาดใซ้งานได้
เพาะสะนั้นแล้ว ขั้นสิเหล้นโน่ดบุ่กอันนี้ โน่ดบุ่กอันนี้ต้องมีแบ็ด หลือมีแบ็ดเตอลี้
ขั้นโน่ดบุ่กอันนี้บ่มีแบ็ดเตอลี้ เฮากะต้องซ่าดแบ็ด ซ่าดแบ็ดกับไฟฟ้า หลือมีปั่กไฟเซี้ยมจากโน่ดบุ่กกับปั่กไฟของเฮา หลือปั่กไฟอยู่บ้าน

Basic vocabulary — Page 27 — Series B, pictures 01-03: tuk tuk, driver, passenger

1
อันนี้คืออี่หยัง อันนี้เป็นลดสามล้อ หลือว่าลดตุ่กตุ่ก
ลดสามล้อหนิ[กับ]ลดตุ่กตุ่กคือกันบ่ กะค้ายๆ กันหนิหละ กะคือกันอยู่ บ่แตกต่างกันหลาย ใซ้งานได้คือกัน
แล้วลดตุ่กตุ่กกับลดสามล้อหนิใซ้งานจั่งใด กะเอาไว้ถ้าขับ กะเอาไว้ถ้าขี่ไปหนั้นไปหนี้ คือกันกับลดใหญ่ คือกันกับลดพิกอั่บหนั้นหละ แต่ว่ามันขี่ได้เล็วบ่หลาย ขี่ได้ซ้าๆ ขี่ได้ส่ำกับลดมอเตอไซหลือว่าซ้ากว่ามอเตอไซอยู่ แต่ว่าขี่ได้บ่เล็วหลาย แต่ว่าสามาดขี่ไปหนั้นไปหนี้ได้ สะดวกคือกัน ส่ำลดใหญ่หนั้นหละเนาะ
แล้วอยู่ในกุงเทบกะมีลดตุ่กตุ่กหลายคือกัน เอามาใซ้เป็นยานพาหะนะหลือว่าลดลับส่งนั้นเอง ค้ายๆ กับลดแท็กซี้เนาะ ใซ้งานคือกันกับลดแท็กซี้ แบบว่า ลับพุโดยสานไปส่งหม้องหั้นหม้องหนี้ กะค้ายๆ กับลดแท็กซี้

2
เขากำลังเฮ็ดหญัง กะมีพุซายพุหนึ่ง เขากำลังขับลดตุ่กตุ่กหลือว่าลดสามล้ออยู่
เขาสิขับลดอันนี้ไปใส กะบ่ฮู้คือกัน อาดสิขับไปตะหลาดตะลี หลือว่าไปซื้อของกะได้
แต่ว่าในบางเที่ย ขั้นพุซายคนนี้ขับลดตุ่กตุ่ก หลือว่าเขาสิเป็นคนขับตุ่กตุ่กลับจ้าง เขากะอาดสิไปลับพุโดยสาน หลือว่าไปหม้องหั้นไปหม้องหนี้ เพื่อที่สิไปลับไปหาพุโดยสานนั้นเองเนาะ

3
เขากำลังเฮ็ดหญัง กะมีพุซายพุหนึ่ง กำลังขับลดตุ่กตุ่กอยู่หนั้นหละ
แล้วเขาสิขับไปใส จักคือกัน บ่ฮู้ว่าเขาสิขับไปใส แต่ว่าตอนนี้แนมเห็นคนสองคนอยู่ข้างหลังของเขา หลือว่าเขากำลังบันทุกพุโดยสาน ไปส่งหม้องหนั้นหม้องหนี้ อาดสิไปส่งพุโดยสานกะได้ เพาะว่าเห็นพุหญิงกับพุซายสองคนนั่งอยู่ข้างหลัง
แล้วลดตุ่กตุ่กนี้มันบันจุคนได้หลายคนบ่ หลือว่าคนไปนั่งเทิงลดตุ่กตุ่กหนิได้หลายคนบ่ กะบ่หลายปานใด คนกะนั่งอยู่เทิงลดตุ่กตุ่กได้บ่ส่ำลดเก็งหลือว่าบ่ส่ำลดพิกอั่บเนาะ เพาะว่าพื้นที้มันบ่หลาย มีพื้นที้น้อยๆ หนึ่ง เพาะว่าลดตุ่กตุ่กมันกะมีแค่สามล้อ หม้องนั่งนี้กะสิมีหม้องนั่งคนขับแล้วกะหม้องนั่งพุซ้อนนั้นเอง กะคือได้ปะมานสองสามคน สี่คน ปะมานนั้น อย่างหลายเนาะ

Basic vocabulary — page 07 — Series B, pictures 12-17: box, TV, to plug in

12
นี้คืออี่หยัง นี้คือก่อง
ก่องอี่หยัง บ่ลู้คือกันว่ามันเป็นอี่หยัง เพาะว่าบ่ได้เห็นของอยู่ในก่องนั้น
ก่องมันใหญ่บ่ ใหญ่อยู่ ก่องมันใหญ่หลาย
ก่องมันเป็นลูบจั่งใด ก่องมันเป็นลูบสี่เหลี่ยม ของที่อยู่ในนั้นอาดสิซิ้นใหญ่กะได้

13
เขากำลังเฮ็ดหญัง เขากำลังแกะก่อง
เป็นหญังเขาคือแกะก่อง เขาอาดสิเอาของที่อยู่ในก่องนั้นออกมากะได้
เขาใซ้อี่หยังแกะก่อง เขาใซ้มือของเขาแกะก่อง แล้วกะเปิดก่องออกมา

14
เขากำลังเฮ็ดหญัง เขากำลังจกเอาของมาจากในก่อง
เขาจกอี่หยังออกมา เขาเอาโทละทัดออกมาจากในก่อง
โทละทัดเคี่ยงใหญ่บ่ เคี่ยงใหญ่อยู่ โทละทัดเคี่ยงใหญ่บักคัก
เขาใซ้มือจักข้างจับโทละทัด เขาใซ้มือสองข้างของเขาจับโทละทัด
เขาเอาโทละทัดออกมาแล้ว เขาสิเอาโทละทัดไปใส บ่ลู้คือกันว่าเขาสิเอาโทละทัดไปใส เขาอาดสิเอาโทละทัดนี้ไปใซ้งานกะได้

15
เขาเฮ็ดหญัง เขากำลังญกโทละทัดขึ้นไปตั้งเทิงโต่ะ
เป็นหญังเขาคือญกโทละทัดขึ้นไปตั้งเทิงโต่ะ บ่ลู้คือกัน เขาอาดสิใซ้งานโทละทัดนี้กะได้

16
เขากำลังเฮ็ดหญัง เขากำลังเอาปั่กโทละทัดไปเสียบใส่ปั่กไฟ
ปั่กโทละทัดอันใหญ่บ่ บ่ ปั่กโทละทัดอันบ่ใหญ่ ปั่กโทละทัดอันน้อยๆ
แล้วปั่กไฟอันใหญ่บ่ บ่ ปั่กไฟอันบ่ใหญ่ ปั่กไฟกะอันน้อยๆ คือกัน
ปั่กไฟสีอี่หยัง ปั่กไฟสีฟ้า
เขาใซ้อี่หยังจับปั่กโทละทัด เขาใซ้มือของเขาจับปั่กโทละทัดไปเสียบใส่ปั่กไฟ

17
เขากำลังเฮ็ดหญัง เขากำลังเอาปั่กโทละทัดไปเสียบใส่ปั่กไฟ
เขาเอาปั่กโทละทัดไปเสียบใส่ปั่กไฟแล้วไป่ เขาเสียบแล้วๆ
ขั้นเขาเสียบแล้วๆ เขาสิเฮ็ดอี่หยัง เขากะอาดสิเปิดโทละทัดหลือใซ้งานโทละทัดนั้นกะได้
ปั่กไฟอยู่ไกจากโทละทัดหลายบ่ บ่ ปั่กไฟอยู่บ่ไกหลาย อยู่ใก้ๆ
เขาตั้งโทละทัดไว้ใส เขาตั้งโทละทัดไว้เทิงโต่ะ
โต่ะอันใหญ่บ่ อันใหญ่อยู่ แต่บ่ใหญ่หลาย กะพอดีกับโทละทัด

Basic vocabulary — Page 02 — Series B, pictures 16-20: TV, remote control, to switch on/off, to watch TV

16
นี้คืออี่หยัง อันนี้คือโทละทัด อันนี้เป็นโทละทัด โทละทัดจอแบน โทละทัดเคี่ยงบักใหญ่หนึ่ง ใหญ่กะด้อกะเดี้ย
ปะโยดของโทละทัดกะมีหลายสิ่งหลายอย่างอยู่ เอาไว้ถ้าเบิ่งข่าว ไว้ถ้าเบิ่งกาตูน ไว้ถ้าเบิ่งอันนั้นอันนี้ได้หลายสิ่งหลายอย่าง
โทละทัดมันลาคาแพงบ่ กะแพงอยู่ แพงหลาย แพงคัก ขั้นบ่มีเงินกะซื้อบ่ได้ เพาะว่ามันแพงหลาย

17
นี้คืออี่หยัง อันนี้เป็นลีโหมด อาดสิเป็นลีโหมดโทละทัดกะได้
ลีโหมดเป็นแบบใด ลีโหมดกะเป็นสี่เหลี่ยม อันน้อยๆ เอาไว้ถ้ากด กดเกี่ยวกับโทละทัด หลือว่าใซ้งานคู่กับโทละทัด
ลีโหมดกะอาดสิเอาไว้ถ้าเลี้ยนซ้อง หลือว่ากดไปซ้องนั้นซ้องนี้ หลือว่าเพิ้มเสียงลดเสียง หลือว่าใซ้ไว้ตั้งค้าอันนั้นอันนี้กะได้

18
เขากำลังเฮ็ดหญัง เขากำลังเปิดโทละทัด เขาใซ้มือของเขากดลีโหมด เพื่อว่าเปิดโทละทัด เขาอาดสิอยากเบิ่งโทละทัด เขาเลยสิเปิดโทละทัดนี้
แล้วเขาอยู่ไกโทละทัดบ่ เขาใซ้ลีโหมดกดเปิดโทละทัดอยู่ไกโทละทัดคักบ่ บ่ บ่ไกหลาย ขั้นลีโหมดกับโทละทัดอยู่ไกกันหลาย สันญานมันกะสิบ่ฮอดกัน กะสิบ่เซี้ยมต่อกัน เพาะสะนั้นแล้ว ลีโหมดกับโทละทัดกะสิอยู่ใก้ๆ กัน

19
เขากำลังเฮ็ดหญัง เขากำลังเบิ่งโทละทัด
พุซายคนนี้เขากำลังเบิ่งโทละทัด กำลังจ้องเบิ่งโทละทัด กำลังแนมเบิ่งโทละทัด
เขาอยู่กับใผ เขาอยู่พุเดียว เขาเบิ่งของเขาพุเดียวข้อหล้อ บ่มีฮอดหมู่ อยู่พุเดียวอ้อยต้อย

20
เขากำลังเฮ็ดหญัง เขากำลังปิดโทละทัด
เขาปิดโทละทัดเฮ็ดหญัง เขาอาดสิบ่เบิ่งโทละทัดนี้แล้ว เขากะเลยปิดโทละทัดกะได้
เขาปิดโทละทัดจั่งใด เขาใซ้ลีโหมด หลือว่าใซ้มือของเขากดลีโหมด เพื่อว่าสิปิดโทละทัด
เป็นหญังเขาต้องปิดโทละทัดญ้อนลีโหมด เพาะว่าลีโหมดหนะมันมีปุ่มกดปิดโทละทัด หลือว่าปุ่มกดเปิดโทละทัด
แต่ว่าขั้นเฮาบ่อยากกดลีโหมดนี้ เฮากะไปปิดอยู่หม้องโทละทัดกะได้ อยู่โทละทัดมันกะสิมีปุ่มเปิดหลือว่าปุ่มปิดโทละทัดอยู่ เฮากะสามาดไปปิดหลือไปเปิดอยู่หม้องโทละทัดกะได้ แต่ว่าขั้นเฮาบ่อยากญ่างไปโทละทัด เฮากะจับลีโหมดนี้ แล้วกะปิดหลือว่าเปิดโทละทัดกะได้

Basic vocabulary — page 11 — Series B, pictures 01-03: candle, to light, match, lighter

1
นี้คืออี่หยัง นี้คือเทียน
เทียนแท่งสีขาว มีเทียนแท่งเดียว
เทียนเฮ็ดมาจากอี่หยัง เทียนเฮ็ดมาจาก[ขี้ผึ้ง]*
เทียนใซ้จั่งใด เทียนเอาไว้ถ้าจุด เทียนเอาไว้ถ้าไต้ไฟ
อยู่ในใจกางของเทียน สิมีเส้นด้ายอยู่ เอาไว้ถ้าจุดไฟ หลือเอาไฟมาจุดตงด้ายนี้ แล้วมันกะสิเกิดแสงสะหว่าง
เทียนขั้นจุดแล้ว มันสิให้แสงสะหว่างบ่ ให้อยู่ มันสิให้แสงสะหว่าง
ขั้นจุดเทียนหม้องใด หม้องนั้นกะสิฮุ่ง หม้องนั้นกะสิมีแสงสะหว่าง เฮ็ดให้บ่มืด

2
เขากำลังเฮ็ดหญัง เขากำลังไต้เทียน เขาใซ้ไม้ขีดไต้เทียน
ไม้ขีดอี่หยัง กะไม้ขีดไต้เทียน ไม้ขีดมันสิมีไฟอยู่ในไม้ขีด ขั้นเอาไม้ขีดนี้ไปไต้เทียนแล้ว เทียนกะสิติด เทียนกะสิเห็นฮุ่ง
ไม้ขีดเฮ็ดมาจากอี่หยัง ไม้ขีดเฮ็ดมาจากไม้
แล้วอยู่หัวไม้ขีด สิมีเซื้อเพิงอยู่ เฮ็ดให้มีไฟ หลือสามาดจุดไฟได้
ไม้ขีดอันหนึ่ง ใซ้ได้เที่ยหนึ่ง บ่สามาดใซ้ได้หลายเที่ย
เทียนขั้นเฮาใซ้งานไปเลี้ยยๆ แล้ว หลือใซ้งานโดนๆ แล้ว มันสิเบิดเป็นบ่ เบิดเป็นอยู่
เทียนขั้นเฮาใซ้งานไปเลี้ยยๆ มันกะสิละลาย มันกะสิเปี่ยยไปเลี้ยยๆ แล้วมันกะสิเบิดไป
ตอนนี้จุดเทียนแล้ว เทียนมันให้แสงสะหว่างแม่นบ่ แม่นอยู่ เทียนมันให้แสงสะหว่าง ตอนนี้มันกำลังเห็นฮุ่งอยู่

3
เขากำลังเฮ็ดหญัง เขากำลังไต้เทียน
เขาเอาอี่หยังไต้เทียน เขาเอาไฟแซ็กไต้เทียน
ไฟแซ็กเป็นจั่งใด ไฟแซ็กเป็นเซื้อเพิง มีเก่ดอยู่ในไฟแซ็กอันนั้น สามาดเฮ็ดให้ไฟติดได้ สามาดเฮ็ดให้มีไฟได้ แล้วกะสามาดไต้เทียนได้
ไฟแซ็กเฮ็ดมาจากอี่หยัง ข้างนอกไฟแซ็กเฮ็ดมาจากพะสะติก แล้วข้างในไฟแซ็กนั้นสิมีเก่ดอยู่
ไฟแซ็กใซ้ได้โดนบ่ ใซ้ได้โดนอยู่ ใซ้ได้หลายเที่ย โดนบักคักหนึ่ง
ไฟแซ็กมีเปวไฟแม่นบ่ แม่น ไฟแซ็กมีเปวไฟ เพาะว่าไฟแซ็กมันมีเก่ดอยู่ มันกะเลยเฮ็ดให้มีเปวไฟได้

*should be LF-LF, probably interference from standard Thai

Basic vocabulary — Page 28 — Series B, pictures 01-03: to hang, picture, monkey, branch, socks

1
เขากำลังเฮ็ดหญัง เขากำลังเอาพาบไปห้อย
พาบอี่หยัง เป็นลูบพาบวาด หลือว่าพาบถ่ายนี้หละ เป็นกอบสี่เหลี่ยม
เขาสิเอาไปห้อยเฮ็ดหญัง เขากะสิห้อยไว้ฝาผะหนัง หลือว่าห้อยไว้ถ้าโซ ไว้ถ้าเบิ่ง
เขาห้อยไว้ใสเกาะ ห้อยไว้ฝาผะหนัง ติดกับฝาผะหนังหละ
แล้วเขาห้อยจั่งใด กะสิมีเซียกติดอยู่กอบลูบ หลือว่าหม้องพาบวาด แล้วกะไปห้อยใซ้ตะปู ตะปูที่มันตอกลงไปในฝาผะหนัง เขากะสิเอาตะปูหนั้นหละ ตะปูดอกหนึ่งตอกลงไปในฝาผะหนัง แล้วแต่ว่าเฮาสิตอกอยู่หม้องใด เอาไว้จุดใด เฮากะตอกตะปูลงไปหม้องนั้น แล้วเฮากะเอาพาบอันนี้ไปห้อยอยู่หม้องตะปูหม้องนั้น หลือว่าไปห้อยอยู่หม้องข้างฝาหม้องนั้น

2
อันนี้คืออี่หยัง อันนี้เป็นสัด เขาเอิ้นว่าลิง มันเป็นลิง
ลิงกำลังเฮ็ดหญังอยู่ มันกำลังห้อยอยู่ ห้อยอยู่เทิงง่าไม้ อยู่เทิงกิ่งไม้หนั้นหละ
กิ่งไม้กิ่งใหญ่บ่ บ่ใหญ่ปานใดดอก
เอ๊า แล้วเป็นหญังลิงคือไปห้อยอยู่หนั้น กะจักคือกัน มันอาดสิมักอยู่เทิงกกไม้กะได้ มันกะเลยห้อยอยู่เทิงกกไม้ หลือว่าห้อยอยู่เทิงง่าไม้
ในโตของลิงมันมีอี่หยังแน่ มันกะสิมีแขน มีขา มีแขนสองข้าง มีขาสองข้าง มีหางพ้อม มีขนพ้อม ลิงซู่โตสิมีขนหลายพ้อม เกียบซู่จุดหลือว่าซู่หม้องอยู่ในโตมันเอาโลด
แล้วลิงอันนี้โตสีหญัง อันนี้ลิงโตนี้มันสีส้ม
แล้วลิงโตอื่นสีอื่นได้บ่ ได้อยู่ แล้วแต่ลิงพันนั้นหลือว่าลักสะนะนั้น มันกะสิแตกต่างกันไป บ่คือกัน
แล้วลิงมันอาสัยอยู่ใส มันกะอยู่ในป่า อยู่ในป่าในดงในโคกพุ้นหละ
ลังเที่ยคนกะจับมันเอาไว้ในสวนสัด หลือว่าเอามันมาเลี้ยงอยู่บ้าน

3
อันนี้อี่หยัง อันนี้เป็นถุงเท้า เขากำลังตากถุงเท้าอยู่
ถุงเท้ามีจักกิ่ง มีหกกิ่ง
กะอาดสิมัน อาดสิสกกะปก หลือว่ามันเปี้ยน เขากะเอามาซักเพื่อที่สิให้มันสะอาด ให้มันหอมเนาะ เพื่อที่สิใซ้งานต่อไปในมื้อใหม่
แล้วเขาตากอยู่ใส กะตากอยู่กางแก้ง หลือว่าตากอยู่หม้องมันมีแดด ให้แดดส่อง ขั้นแดดถืก หลือว่ามันตากใส่แดด มันกะสิแห้ง หลือว่าเฮ็ดให้มันบ่เหม็นอับเนาะ ขั้นมันบ่มีแดด มันกะสิเหม็นอับ หลือว่าเหม็นตากบ่แห้งนั้นเองเนาะ

Basic vocabulary — Page 02 — Series B, pictures 06-11: bottle, water, to open, to pour, glass, to drink, trash

6
นี้คืออี่หยัง อันนี้เป็นขวดน้ำ ขวดน้ำเต็มขวดเอาโลด
ขวดน้ำกะเป็นแก้ว แก้วกะสีใสๆ
ในขวดนั้นกะมีน้ำพ้อม น้ำกะน้ำสีฟ้าๆ
ขวดน้ำกะมีฝาพ้อม ฝาขวดน้ำกะสีส้มๆ
ขวดน้ำมีจักขวด ขวดน้ำมีขวดเดียว มีขวดเดียวข้อหล้อ

7
เขากำลังเฮ็ดหญัง เขากำลังเปิดฝาขวดน้ำ เขากำลังเอาแนวเปิดฝาขวดน้ำงัดฝาขวดน้ำขึ้น
เขาเปิดฝาขวดน้ำเฮ็ดหญัง เขาอาดสิหิวน้ำ หลืออาดสิกินน้ำในขวดนี้ เขากะเลยเปิดฝาขวดน้ำออก

8
นี้คืออี่หยัง อันนี้เป็นแก้วน้ำ
เป็นโจกน้ำนั้นหละ เอาไว้ถ้าใส่น้ำ หลือว่าเอาไว้ใส่สิ่งต่างๆ ที่มันเป็นน้ำ แล้วเอาไว้ถ้ากิน
แก้วน้ำอันใหญ่บ่ โจกอันใหญ่บ่ บ่ กะอันบ่ใหญ่ปานใด กะอันพอดีนี้หละ อันพอเท่าๆ

9
เขากำลังเฮ็ดอี่หยัง เขากำลังเทน้ำ เขากำลังเทน้ำใส่แก้ว
มือหนึ่งของเขากำลังจับขวดน้ำ แล้วกะลินน้ำหลือว่าเทน้ำใส่แก้วน้ำ
เขาเทน้ำเฮ็ดหญัง เขากะอาดสิเอาน้ำนี้ไปกิน หลือว่าสิกินน้ำ เขากะเลยเทน้ำใส่แก้ว แล้วกะสิเอาไปกิน

10
เขากำลังเฮ็ดหญัง เขากำลังกินน้ำ พุซายคนนี้เขากำลังกินน้ำ
เป็นหญังเขาคือกินน้ำ จักคือกัน เขาอาดสิหิวน้ำ เขากะเลยกินน้ำกะได้
แล้วเขากินน้ำจั่งใด เขากินน้ำในแก้ว เขาอาดสิเทน้ำในขวดแล้วมาใส่แก้วนี้ แล้วเขากะจับแก้วน้ำนี้มากิน
เขากินน้ำหลายบ่ จัก จักคือกัน จักว่าเขากินหน้อยกินหลาย บ่ฮู้นำเขา

11
เขากำลังเฮ็ดหญัง เขากำลังดึกขวดถิ้ม
เขาดึกขวดถิ้มเฮ็ดหญัง เขาอาดสิบ่ใซ้งานขวดนี้แล้ว หลือว่าขวดน้ำนี้มันเบิดปะโยดแล้ว เขากะเลยสิเอาขวดน้ำนี้ถิ้ม หลือว่าขวดนี้มันอาดสิเป็นขะยะแล้ว เขากะเลยเอาไปถิ้มถังขะยะ
เขาเอาถิ้มจั่งใด เขากะอาดสิจับขวดน้ำมาแล้ว เขากะโญนหลือว่าดึกใส่ถังขะยะ
แล้วเขาโญนแฮงบ่ จักว่าโญนแฮงโญนค่อย กะอาดสิโญนค่อยๆ กะได้ เพาะว่ามันเป็นแก้ว มันเป็นขวด โญนแฮงบ่ได้ ขั้นโญนแฮงมันกะสิแตก ขั้นโญนค่อยๆ มันกะสิบ่แตก เพาะสะนั้นแล้ว เขากะอาดสิโญนค่อยๆ กะได้

Basic vocabulary — page 14 — Series B, pictures 01-04: paper, pen, to write, scissors, to cut

1
นี้คืออี่หยัง นี้คือกะดาด กะดาดหลายแผ่น กะดาดแผ่นสีขาว ขาวจุ่นพู่นอยู่ แผ่นบักใหญ่หนึ่ง
กะดาดมันเป็นลูบสี่เหลี่ยม มันเป็นซงสี่เหลี่ยม ตงดีๆ
กะดาดมันเอาไว้เฮ็ดหญัง กะดาดเอาไว้เขียน เอาไว้วาดลูบ เอาไว้ใซ้งาน สามาดเฮ็ดได้หลายอย่าง
กะดาดมันเฮ็ดมาจากอี่หยัง กะดาดเฮ็ดมาจากไม้ เฮ็ดมาจากพืด คนเฮาสิตัดไม้ หลือเอาไม้นั้นมาลีไซเคินเฮ็ดเป็นกะดาด
ขั้นเอากะดาดหลายๆ แผ่นมาลวมกันๆ หลายๆ มันกะสิกายเป็นสะหมุด หลือเฮ็ดเป็นสะหมุดได้
ขั้นมีกะดาดอยู่แผ่นเดียว เขากะสิเอิ้นว่ากะดาด ขั้นเอากะดาดหลายแผ่นมาลวมกันเฮ็ดเป็นปึกๆ เขากะสิเอิ้นว่าสะหมุด
ตอนนี้กะดาดมีฮอยเขียนบ่ บ่ ตอนนี้กะดาดมันยังว้างเป่าอยู่ บ่มีฮอยเขียนอี่หยังเลย

2
นี้คืออี่หยัง อันนี้กะกะดาดคือกัน เป็นกะดาดหลายแผ่นคือกัน ตอนนี้เขากำลังเขียนกะดาดอยู่
เขากำลังเขียนอี่หยังบุอยู่ในกะดาด เขาใซ้ปากกาเขียนอยู่ในกะดาดนั้น อาดสิเขียนเป็นโตหนังสือ ปากกาแท่งสีแดง แล้วเขากะเขียนลงไปเป็นโตหนังสือสีแดงคือกัน
เขาใซ้มือของเขาข้างขวาจับปากกา แล้วกะเขียนอยู่ในกะดาดนั้น
ฮู้บ่ว่าเขาเขียนเป็นโตอี่หยัง หลืออักสนอี่หยัง อันนี้กะบ่ฮู้คือกัน จักว่าเขาเขียนอี่หยัง อาดสิเป็นโตหนังสือ จักว่าเป็นโตหนังสือปะเทดอี่หยัง อันนี้กะบ่ฮู้นำคือกัน

3
นี้คืออี่หยัง นี้คือกันไก กันไกอันบักญาวหนึ่ง
กันไกเป็นเหล็ก ด้ามมันสีดำ อาดสิเป็นพะสะติกกะได้
กันไกเอาไว้เฮ็ดหญัง กันไกเอาไว้ตัด เอาไว้ตัดหลายสิ่งหลายอย่าง เอาไว้ตัดกะดาดกะได้ เอาไว้ตัดเซียกกะได้ ตัดเสี้ยผ้ากะได้ สามาดตัดได้หลายอย่าง
กันไกมันตาย้านบ่ กะตาย้านอยู่ อันตะลายพ้อม กันไกมันตาย้านแล้วกะอันตะลาย เพาะว่ากันไกมันคม มันแหลม มันสามาดปาดได้ หลือเฮ็ดให้เฮามีแผได้คือกัน

4
เขากำลังเฮ็ดหญัง เขากำลังตัดกะดาด
จักพุใดบุ ตอนนี้เขากำลังตัดกะดาดอยู่ เขาใซ้กันไกอันหนึ่ง กำลังตัดกะดาดอยู่ ตัดกะดาดแผ่นสีขาว แผ่นสี่เหลี่ยม ใซ้กันไกตัดลงไปหม้องกางกะดาด อาดสิตัดเป็นลูบสี่เหลี่ยมกะได้ จักเขาสิตัดไปเฮ็ดอี่หยัง
เขาใซ้มือของเขาข้างหนึ่งจับกะดาดอยู่ มือของเขาอีกข้างหนึ่งกำลังจับกันไกอยู่ แล้วกะตัดกะดาดลงไป
เป็นหญังเขาคือตัดกะดาด อันนี้กะบ่ลู้คือกัน จักว่าเขาสิตัดกะดาดเฮ็ดหญัง อาดสิตัดไปใซ้งาน หลือเฮ็ดอี่หยังบางสิ่งบางอย่างกะได้

Basic vocabulary — page 14 — Series B, pictures 05-08: nose, to smell, flower, to stink, to defecate

5
นี้คืออี่หยัง นี้คือดัง อันนี้คือดังของคน ดังมันเป็นอะวัยยะวะของคน เป็นอะวัยยะวะในล้างกายของคนเฮานี้หละ
ดังเอาไว้หายใจ ขั้นคนเฮาบ่มีดัง เฮากะหายใจบ่ได้ เพาะสะนั้นแล้ว ทุกคนต้องมีดัง หลือสัดทุกโตต้องมีดัง
ขั้นบ่มีดัง กะหายใจบ่ได้ หลือบ่สามาดดมกิ่นอี่หยังได้เลย
ดังสิอยู่ส่วนหน้าของเฮา อยู่เทิงใบหน้า อยู่หม้องใบหน้าของเฮา อยู่เทิงปาก หลืออยู่ใต้ตาของเฮา
หัวของเฮานี้ มีอะวัยยะวะใดแน่ มีอันอื่นอีกบ่ กะมีอยู่ มีหูพ้อม มีปาก มีตา มีคิ้ว มีคาง มีผม มีหัว มีหน้าผาก มีแก้ม มีอีกหลายสิ่งหลายอย่างที่อยู่เทิงใบหน้าของเฮา
แต่ละอย่างกะใซ้งานคนละแบบ อย่างเซ้น ปากกะเอาไว้กิน ตากะเอาไว้แนม หูกะเอาไว้ฟังเสียง หลือว่าแข้วกะเอาไว้กัดสิ่งของ หลือเอาไว้กัดกินแนวกินนั้นหละ แต่ว่าดังนี้เอาไว้หายใจ หลือดมกิ่นต่างๆ

6
เขากำลังเฮ็ดหญัง หลือเกิดอี่หยังขึ้น จักคือกัน แต่ว่าแนมเบิ่งพาบนี้แล้ว เห็นค้ายๆ ว่าเขากำลังดมกิ่นอยู่ หลือเขากำลังได้กิ่นอี่หยังบางสิ่งบางอย่าง จักเป็นกิ่นอี่หยัง แต่กะบ่ฮู้คือกัน ตอนนี้เขากำลังดมอยู่ จักว่าเขาดมแบบใด เขากำลังใซ้ดังของเขาดมกิ่นนั้นอยู่ บ่ลู้ว่ากิ่นนั้นมันมาแต่ใส สิหอมหลือสิเหม็นกะบ่ลู้คือกัน

7
เขากำลังเฮ็ดหญัง เขากำลังดมกิ่น
ตอนนี้เขากำลังดมกิ่นอยู่ เขาดมกิ่นดอกไม้อยู่ มีดอกไม้อยู่หน้าของเขา จักบ่ลู้ว่าเป็นดอกอี่หยัง ดอกมันดอกบักใหญ่หนึ่ง
ดอกสีเหลียง หลือดอกสีส้ม ใจกางของมันเป็นสีส้ม เกสอนหลือดอกของมันกะเป็นสีเหลียง บานออกใบดอกบักใหญ่หนึ่ง ใบมันกะสีเขียว เขียวจึ่งคื่งอยู่
ตอนนี้เขากะกำลังดมอยู่ คือสิหอมหลาย ได้กิ่นดอกไม้แล้วเขาคือสิสดซื้น เขาคือสิมีความสุขหลาย ที่ได้ดมกิ่นดอกไม้ เพาะว่ากิ่นดอกไม้มันคือสิหอมคัก
แล้วตอนนี้เขากะกำลังหลับตาพ้อม เขาคือสิมีความสุขหลาย

8
เขากำลังเฮ็ดหญัง เขากำลังตกใจ เขากำลังได้กิ่นขี้หมา
มีหมาโตหนึ่ง กำลังขี้อยู่ ขี้ออกบักหลายหนึ่ง หมาโตสีเหลียง มันคือสิมีความสุขหลาย มันได้ขี้ มันกำลังขี้ออกไป แล้วพุซายคนนี้กะญ่างมาพอดี พอพุซายคนนี้เห็น กะตกใจ แล้วกะได้กิ่นขี้หมานี้
เขาคือสิใจฮ้ายคัก คือสิสูนแฮง เพาะว่าเขาได้กิ่นขี้หมา กิ่นขี้หมานี้คือสิเหม็นคัก คือสิเหม็นกะด้อกะเดี้ย คือสิเหม็นคักเติบ

Basic vocabulary — page 16 — Series B, pictures 05-08: fan, to switch on/off

5
นี้คืออี่หยัง นี้คือพัดลม เป็นพัดลมตั้งโต่ะ หลือเป็นพัดลมตั้งพื้น บ่แม่นพัดลมฝาผะหนัง
พัดลมอันนี้เอาไว้เฮ็ดหญัง เอาไว้ถ้าเฮ็ดให้ความเย็น ไว้ถ้าเพิ้มความเย็นนั้นหละ
ญามเวลาฮ้อน หลืออากาดฮ้อน เฮาสามาดเปิดพัดลมนี้ได้ แล้วสิเฮ็ดให้อากาดเย็น หลือเฮ็ดให้เฮาเย็นนั้นหละ
พัดลมอันนี้ใซ้งานจั่งใด พัดลมอันนี้สิมีสายไฟ เสียบปั่กไฟฟ้า แล้วกะสิมีปุ่มเปิดกับปุ่มปิด
ขั้นเฮาสิใซ้งานพัดลมอันนี้ เฮากะเสียบปั่กไฟฟ้า แล้วเฮากะเปิดปุ่มเปิด แล้วมันกะสิติด แล้วพัดลมกะสิสามาดใซ้งานได้
พัดลมอันนี้ใซ้ไฟฟ้าบ่ ใซ้อยู่ พัดลมอันนี้ใซ้ไฟฟ้าพ้อม ขั้นบ่มีไฟฟ้า มันกะเปิดบ่ติด ขั้นมีไฟฟ้า มันกะสามาดใซ้งานได้

6
เขากำลังเฮ็ดหญัง เขากำลังเปิดพัดลม
เป็นหญังเขาคือเปิดพัดลม บ่ลู้คือกัน เขาอาดสิฮ้อน หลืออากาดมันฮ้อน เขากะเลยเปิดพัดลม เพื่อเพิ้มความเย็นกะได้
คือฮู้ว่าเขาเปิดพัดลม กะฮู้เพาะว่า เขากำลังเปิดปุ่มเปิดพัดลม แล้วพัดลมมันกำลังหมุนอยู่ พัดลมมันกำลังใซ้งานอยู่ กะเลยฮู้ว่าเขากำลังเปิดพัดลม
เป็นหญังเขาคือกดปุ่ม กะต้องกดปุ่ม เพาะว่า ขั้นบ่กดปุ่ม มันกะบ่ติด เพาะว่า ต้องกดปุ่มเปิดกับปุ่มปิด ขั้นสิเปิดพัดลม กะต้องเปิดปุ่มเปิด ขั้นสิปิดพัดลม กะต้องปิดปุ่มปิด

7
พัดลมมันกำลังเป็นหญัง พัดลมมันเป็นอี่หยังอยู่ตอนนี้ พัดลมมันกำลังเปิดอยู่ พัดลมมันกำลังใซ้งานอยู่ เพาะว่ามีคนไปเปิดพัดลม หลือใซ้งานพัดลม แล้วเฮ็ดให้พัดลมหมุน หลือพัดลมใซ้งานอยู่
ตอนนี้มันเย็นบ่ กะเย็นอยู่ เพาะว่าเปิดพัดลมแล้ว พัดลมกะสิเพิ้มความเย็นให้เฮา สิเฮ็ดให้อากาดเย็น สิเฮ็ดให้มันเย็นขึ้น
ขั้นมันเย็นแล้วมันสิคายความฮ้อนบ่ กะคายความฮ้อนอยู่ ขั้นเปิดพัดลมแล้ว มันกะสิเฮ็ดให้เย็น บ่เฮ็ดให้ฮ้อน สิเฮ็ดให้อากาดเย็นขึ้น
พัดลมโตนี้มันมีเสียงบ่ พัดลมโตนี้มันเสียงดังบ่ กะเสียงดังอยู่ แต่บ่เสียงดังหลาย กะแล้วแต่โต แล้วแต่ลุ้น
ขั้นลุ้นใดเสียงแฮง มันกะเสียงแฮง ขั้นลุ้นใดเสียงเบา มันกะเสียงเบา แล้วแต่ลุ้น แล้วแต่ยี้ฮ้อพัดลม
พัดลมโตนี้มันหมุนเล็วบ่ กะหมุนเล็วอยู่ เพาะว่าขั้นหมุนเล็ว มันกะเย็น มันกะเย็นคัก เย็นคักอี่หลี ขั้นมันหมุนซ้า มันกะสิบ่เย็น มันกะสิเย็นหน่อยเดียว บ่เย็นคัก

8
เขากำลังเฮ็ดหญัง เขากำลังปิดพัดลม
เป็นหญังเขาคือปิดพัดลม อันนี้กะบ่ลู้คือกัน เขาอาดสิบ่ใซ้งานพัดลมแล้วกะได้ เขากะเลยปิดพัดลม
คือฮู้ว่าเขาปิดพัดลม กะฮู้เพาะว่าเขากำลังกดปุ่มปิดพัดลม แล้วพัดลมมันกำลังหยุด พัดลมมันบ่ได้ใซ้งาน กะเลยฮู้ว่า เขากำลังปิดพัดลม เขากำลังบ่ใซ้งานพัดลมอยู่